السلام علیکم سامعین!
سندھی لئنگویج اتھارٹی حیدرآباد کی جانب سے تیار کردہ سندھی کورس کے ساتھ، میں ہوں ڈاکٹر فہمیدہ حسین۔
پچھلے سبق میں ہم نے سندھی کے مذکر اور مؤنث الفاظ میں فرق کے بارے میں جانا تھا، کہ ایسے الفاظ، جن کے آخری حروف پر پیش یا ’ اُ‘ کی آواز ہو یا آخر میں ’او ‘ کی آواز ہو، وہ عموماً مذکر ہوتے ہیں، جبکہ جن الفاظ کے آخری حروف پر زبر، زیر یا ’ اِی‘ کی آواز ہو، وہ عموماً مؤنث ہوتے ہیں۔ اس حوالے سے آپ نے ایک سوال بھی پوچھا تھا کہ ان حرکات کا درست تلفظ کے علاوہ بھی کیا کوئی اور کام ہے؟
جی ہاں! ان حرکات کی درست ادائگی سے تلفظ کا تعلق تو ہے، مگر ابھی میں چونکہ تلفظ پر زیادہ زور نہیں دے رہی، اس لیے ان کا دوسرا مقصد بتا دیتی ہوں، اور وہ ہے عدد۔
آپ نے محسوس کیا ہوگا کہ یہ تمام الفاظ ایسے مذکر یا مؤنث اسم ہیں جو عدد واحد رکھتے ہیں۔ سندھی میں ان کو عدد جمع میں تبدیل کرنے کے لئے ان حرکات سے مدد لی جاتی ہے۔ یعنی ان الفاظ کی آخری حرکت /آواز یا اعراب نہ صرف یہ طے کرتی ہے کہ اِن کی جنس کیا ہے، بلکہ عدد کا بھی اسی سے پتہ چلتا ہے۔
مثلاً ’پیش‘ کی حرکت والے مذکر اسم لے لیتے ہیں۔ جب ان کو جمع میں تبدیل کرنا ہو تو ان کا آخری ’پیش‘ ہٹا کر ’زبر‘ لگاتے ہیں۔
- ایک قلم کے لیے کہتے ہیں ’قلمُ‘۔ تو جب جمع ہوگی تو کہیں گے ’قلمَ‘۔ آپ اس میں کنفیوز مت ہوئیے گا کہ میں نے آپ کو یہ بتایا تھا کہ مؤنث اسم میں بھی ’اَ‘ کی آواز آخر میں ہوتی ہے، لیکن وہ واحد میں ہوتی ہے۔ یہاں پر ہم نے:
’قلمُ‘ کی جمع بنائی ’قلمَ‘ (قلمُ- قلَمَ)
’کاغذُ‘ کی جمع ہوگی ’کاغذَ‘ (ڪاغذُ- ڪاغذَ)
’باغُ‘ کی جمع ہوگی ’باغَ‘ (باغُ- باغَ)
’گھرُ‘ کی جمع ہوگی ’گھرَ ‘ (گهرُ- گهَر)
اب آپ بتائیے اس اصول کے تحت ’خطُ‘ کی جمع کیا ہوگی؟
اسماء: ’خطُ‘ کی جمع ’خطَ‘ (خطُ- خطَ)
اسی طرح ’ جہازُ‘ کی جمع ’ جہازَ‘ (جهازُ- جهازَ)
’شاگردُ‘ کی جمع ’ شاگردَ‘ (شاگردُ- شاگردَ)
استاد: حسن! آپ بھی کچھ الفاظ کو جمع میں تبدیل کرکے بتائیں۔
حسن: ’فرشُ‘ کی جمع ہوگی ’فرشَ‘ (فرشُ- فرشَ)
’گلاسُ‘ کی جمع ہوگی ’گلاسَ‘ (گلاسُ- گلاسَ)
’شہرُ‘ کی جمع ہوگی ’شہرَ‘ (شهرُ- شهرَ)
استاد: ٹھیک ہے۔ اب ایسے مذکر اسموں کی طرف آتے ہیں، جن کے آخر میں سندھی میں ’او‘ کی آواز ہوتی ہے۔ مثلاً:
’چھوکرو‘ کی جمع ہوگی ’ چھوکرا‘ (ڇوڪرو- ڇوڪرا)
’ٹوکرو‘ کی جمع ہوگی ’ ٹوکرا‘ (ٽوڪرو- ٽوڪرا)
’لفافو‘ کی جمع ہوگی ’لفافا‘ (لفافو- لفافا)
اسماء: میڈم! اس سے یہ ظاہر ہوتا ہے کہ اردو میں جو الفاظ کی واحد میں صورت ہوتی ہے، وہ سندھی میں جمع کی صورت ہے۔
استاد: بالکل صحیح – اردو میں ’لفافہ‘، سندھی میں ’لفافو‘ ہو گیا۔ اس کے بعد جب جمع بنائی تو یہ پھر سے’لفافا ‘ ہوگیا۔ کچھ الفاظ کو آپ بھی جمع کرکے بتائیے اسماء۔
اسماء: ’ہفتو ‘ جمع میں ہوگا ’ہفتا‘ (هفتو- هفتا)
’گھوڑو‘ جمع میں ہوگا ’گھوڑا‘ (گهوڙو- گهوڙا)
’پردو‘ جمع میں ہوگا ’ پردا‘ (پردو- پردا)
حسن: میڈم! کچھ الفاظ کی میں جمع بناؤں؟
استاد: بنائیے۔
حسن: ’طوطو‘ کی جمع ’طوطا‘ (طوطو- طوطا)
’نانو‘ کی جمع ’نانا‘ (نانو- نانا)
’کیلو‘ کی جمع ’کیلا‘ (ڪيلو- ڪيلا)
استاد: بالکل ٹھیک۔
اب آئیے مؤنث الفاظ کو دیکھتے ہیں، جمع میں کیا صورت اختیار کرتے ہیں۔ سندھی کے ایسے مؤنث الفاظ، جن کے آخر میں زبر یا ’ اَ‘ کی آواز ہوتی ہے، ان میں’ اوں‘ کی آواز یا لاحقہ ملاتے ہیں جو جمع بنانے کے لیے استعمال ہوتا ہے۔
|
واحد |
جمع |
|
|
|
تصویرَ عورتَ زمینَ امیدَ میزَ |
تصویروں عورتوں زمینوں امیدوں میزوں |
(تصوير- (عورتَ- (زمينَ- (اميدَ- (ميزَ- |
تصويرون) عورتون) زمينون) اميدون) ميزون) |
اسماء: میڈم! جس طرح اردو میں ’ایں‘ کا اضافہ کرتے ہیں اور تصویر سے ’تصویریں‘ یا عورت سے ’عورتیں‘ بنتا ہے، اسی طرح سندھی میں’ اوں‘ کا اضافہ کریں گے؟
استاد: آپ نےجہاں جہاں جمع میں اردو میں’ ایں‘ کا لاحقہ لگایا وہاں سندھی میں ’اوں‘ کا لگتا جائے گا۔ حسن! آپ بھی کچھ مؤنث الفاظ جمع میں تبدیل کرکے دکھائیے۔ اگر آپ کو سندھی کے کچھ اور الفاظ آتے ہیں تو انہیں بھی استعمال کیجئے، ورنہ سندھی- اردو لغت سے الفاظ دیکھ لیجئےگا۔
حسن: جی میرے پاس دو الفاظ ہیں۔
’کھٹَ‘ کی جمع ’کھٹوں‘ ہوگی۔’ کھٹ‘ ’چار پائی‘ یا ’کھاٹ‘ کو کہتے ہیں۔ (کٽَ- کٽون)
’زالَ‘ کی جمع ’زالوں‘ ہوگی۔ ’زالَ‘ ’بیوی‘ یا ’عورت‘ کو کہتے ہیں۔ (زالَ- زالون)
استاد: اچھا- اب آپ بھی کوشش کیجئے۔
اسماء: ’ٹنگَ‘ کی جمع ’ٹنگوں‘ – ’ٹانگ‘ کو سندھی میں ’ٹنگَ ‘ کہتے ہیں۔ (ٽنگ- ٽنگون)
’نَتھ‘ کی جمع ’ نتھوں‘ (نٿَ- نٿون)
’صورتَ‘ کی جمع ہوگی ’صورتوں‘ (صورتَ- صورتون)
استاد: اس کے بعد وہ مؤنث الفاظ آتے ہیں، جن کے آخر میں زیر یا ’ اِ ‘ کی آواز ہو یا لمبی ’اِی‘ کی آواز ہو۔ مثلاً: ’اکِھ‘، ’کرسی‘ وغیرہ۔ ان کو جمع بنانے کے لئے آخر میں ’یوں‘ کی آواز جوڑیں گے۔
’اَکھِ‘ کی جمع ہوگی ’اکھیوں‘ (اکِ- اکيون)
’بھتِ‘ کی جمع ہوگی ’بھتیوں‘ (ڀتِ- ڀتيون)
’چھتِ‘ کی جمع ہوگی ’چھتیوں‘ (ڇتِ- ڇتيون)
’کرسی‘ کی جمع ہوگی ’کرسیوں‘ (ڪرسي- ڪرسيون)
’چھوکری‘ کی جمع ہوگی ’چھوکریوں‘ (ڇوڪري- ڇوڪريون)
’چٹھی‘ کی جمع ہوگی ’چٹھیوں‘ (چٺي- چٺيون)
استاد: یعنی ’زیر‘ والے اور ’اِی‘ والے الفاظ کو جمع بناتے وقت ہم ’یوں‘ کا لاحقہ لگاتے ہیں۔ اور اس طرح مؤنث اسموں کو جمع بنایا جاتا ہے، اب اسماء اور حسن! یہ آج کا سبق یہاں پر ختم کرتے ہیں، انشاء اللہ کل پھر آپ سے ملاقات ہوگی۔ خداحافظ۔
